Joh 5 | KYG | STEP | Mago afina'mo utegeno Yesu'a Yulusalemu taonifi'mo hopa afina'mo u'niye.

John 5

Yesu'a ani kotute'mo mai'niya vekamo alino alagepa huno ate'niya gemae

1 Mago afina'mo utegeno Yesu'a Yulusalemu taonifi'mo hopa afina'mo u'niye. 2 Yulusalemu taonifi'mo sipisipi anaga'mo u'a lamite'a e'a hai ete'a nehaya kipa'mo hane'niya yate'mo ani kotu'mo hane'niye. Ani ani kotufe'mo Himulu gefati'mo agi'amo Metasaitagayagae. 3 Ani ani kotu'mo agi'nale'mo faefu'a no'mo nokato'mu'ageke'mo hane'niya hiyate nopi'mo asole vaya'mo kaita hapau'niya vaya'mo e'a havae'a mai'nae. Apaulagamo ali hu'niya vaya'mo maige apaiyamo hosu'niya vaya'mo maige kanage kanaga osu'a havae'a ne'maiya vaya'mo maige hu'a mai'nae. Ani ani kotu'mo'a kanage kanage hisiya'ae'mo yagai'a mai'ne'a age'a mai'nae. 4 Goti enisole veka'amo'mo mago afina'mo emineno ani ani kotute'mo ame ali'nigeno kanage kanage hu'nige'apae'mo aeno apakaseno ani kotupi'mo hogoteno lami'niya vekamo na agufa kaita'mo hau'nifi alino hageno ate'nigeno afa'a mai'niye. 5 Ani vayapati'mo mago vekamo teti eiti'a kafugamo kaita hauge hauge huno mai'niye. 6 Yesu'a eno ageyana havaeno mai'nigeno ageteno'ae'mo yatala afina'mo kaita hauge hauge hu'nigeno mai'niye, huno agesa afiteno'ae'mo, kaitakamo kahagesiyafe'mo kahau'nifiye, huno afi ge'nigeno'ae'mo, 7 Ala kava nene, huno, ani'mo'a kanage kanage nehisigeno'ae'mo navalelinuno lamino ani kotupi'mo aeno natesiya vekamo nagae'e'mo o'mai'niya'mofe'mo mago vekamo'a ago aeno nagaseno ani kotupi'mo hogotenuno nelamiye, huno ha pai'nigeno 8 Yesu'a, he tika yakaikonakamo aliteka uvo, huno ha nepaigeno'ae'mo 9 kaita'amo hage'nigeno yakaikona'amo aliteno u'niye. Ani afina'mo Sapati afinane. 10 Yu vaya'mogimo agete'apae'mo, lagae ke'aepa gemo'a huno'ae'mo, yakaikonakamo aliteka ne'vana kavafe'mo Sapati afina'mo mani kava'mo osiyo, huno ka akani male'niye, hu'a ha pai'nageno'ae'mo, 11 alino alagepa huno nate'niya vekamo'mo, yakaikonakamo aliteka uvo, huno naha pai'niye, huno hapa pai'niye. 12 Hapa pai'nige'apae'mo, ina la'mo yakaikonakamo aliteka uvo, huno kaha pai'niye, hu'a afi ge'nageno'ae'mo 13 ani alino hageno ate'niya vekamo Yesu'mae huno o'age'niye. Asole vaya'mo mai'naya'mofe'mo Yesu'a u'niyana ageno aeto osu'niye. 14 Henaga'amo agaemo Yu vaya'ai alopa mono nopi'mo mai'nigeno Yesu'a ageteno'ae'mo, afiyo, hemenimo alagepa huka mai'nane. Hosu kavakamo ataleka mago'e huka osuvo, fiku yanageka mago'e huka hosu kava'mo hisanageno'ae'mo kaitakamo aeno agaseno mago'e hanageke ya'mo kagaete'mo afole aigiye, huno ha pai'niye. 15 Ha pai'nigeno ataleno uno Yu vaya'aife'mo, Yesu'a alino hageno nate'niye, huno hapa pai'nige'apae'mo 16 aepa fai'a apaini hu'a ate'nae. Yesu'a Sapati afina'mo alino hageno ate'niya'mofe'mo apaini hu'a ne'ate'a amagisayafe'mo hu'nae. 17 Yesu'a ge'apile'mo aeno atagaina huno hapa paino'ae'mo, afo'nimo'mo ali'ya'amo o'ataleno muki afina'mo alime alime eno hemeni'e'mo ali'ya'mo ne'aliya agufa kava'mo hu'na ali'ya'amo ne'aluve, huno hapa pai'niye. 18 Ani gemo hu'niya'mofe'mo mago'e hu'a amagisayafe'mo hu'a mai'nae. Agaemo Sapati afina ke'aepa gemo amagino atale'niya kava'age'mo osu'nifa mago'e hosu kava'mo hu'niye, hu'a apakesa afi'naya'mofe'mae. Agaemo Goti'a afo'nimo'mo mai'niye, huno hapa pai'niya agufa gemo huno agai'a'e Goti'e'mo magoke aiyaya vekalane huno hapa paige hu'niya'mofe'mo mago'e hu'a amagisayafe'mo hu'nae.

Goti'a mafa'ne'amo'mo agoti huno apatesiya vekamo lekana paino ate'niya gemae

19 Yesu'a, alagi lama ge lapa nepauve, Mafa'ne'amo'mo agai'amo mago kava'mo afa'a osugiya'monanafa muki ya'mo Afo'amo'a nehiya kava'mo ageteno'aeke'mo nehiye. Agaemo nehiya kava huno mafa'ne'amo'mo ani agufa kava'mo nehiye. 20 Muki ya'mo Afo'amo'mo mafa'ne'ae'mo hau ayamopafi'mo hau'nigeno muki nehiya kava'amo alino ave neliye. Mani kava'mo aeno agase'niya kava'amo mago'e huno alino ave lisigeno hisigetapae'mo lahapau aigae. 21 Muki ya'mo Afo'amo'a fali'naya vaya'mo alino he tino apateteno afa'a maisaya ya'mo alino ne'apamiya kava huno Mafa'ne'amo'a afa'a maisaya ya'mo alino apamisiyafe'mo hau'nisiya vaya'aina afa'a alino ne'apamiye. 22 Muki ya'mo Afo'amo'mo vaya'mo alino fako huno no'apate. Agaemo Mafa'ne'amoke'mo alino fako huno apatesiya kavate'mo lekana paino ate'niye. 23 Muki vaya'amogi muki ya'mo Afo'amo agi'ale'mo ali'a asaga hu'a ne'ataya kava hu'a Mafa'ne'amo agi'ale'mo ali'a asaga hu'a atesayafe'mo alino ate'nigeno emine'niye. Ina lagimo Mafa'ne'amo agi'ale'mo ali'a asaga hu'a no'atesafi ani kava'mo hu'a muki ya'mo Afo'amo'mo alino ate'nigeno emine'niya vekamo agi'ale'mo ali'a asaga hu'a no'atae. 24 Lama ge lapa nepauve, ina lagimo ge'nimo afite'a alino nate'nige'na emine'nova vekae'mo apakesa afi'a fatago nehisafige'a alagepa hu'a maige maige hu'a maisaya ya'mo ali'nae. Apakaemo fali kavategati'mo atale e'a afa'a ne'maiyategamo mai'nayanage'na agoti hu'na apatete'nae'mo, hosu vaya'mo mai'nae, hu'na hapa opaiguve. 25 Lama ge lapa nepauve, Mago afina'mo afole aigiyana ago afole ai'niye. Nefaliya kavategamo mai'naya vaya'mogi Goti mafa'ne'amo ge'amo afa'a afigae. Afi'nisaya vaya'mogi afa'a maisaya ya'mo alite'a maigae. 26 Muki ya'mo Afo'amo'mo agai'amo afa'a maisiya ya'mo aepa vekamo mai'niya kava huno Mafa'ne'amo'a agai'amo afa'a maisiya ya'mo aepa vekamo maisiyafe'mo lekana paino ate'niye. 27 Ani kava huno Mafa'ne'amo'a alino fako huno apatesiyafe'mo lekana paino ate'niye. Vemo Mafa'nemo mai'niya'mofe'mae. 28 Lahapau o'aiyo. Agae afina'mo afole aisigeno'ae'mo agemo ne'aisige'apae'mo fali'naya vaya'mogi afite'apae'mo he tigae. Alagepa kava'mo hu'nisaya vaya'mo he ti e'a afa'a ne'maiyategamo maigae. Hosu kava'mo hu'nisaya vaya'mo he ti'a visageno agoti huno apateteno'ae'mo, hosu vaya'mo mai'nae, huno hugiye.

Yesufe'mo na agufa vekamo mai'nifi hu'a hu'naya vaya'ai apava gemae

30 Nagai'nimo nagesa afi'na mago kava'mo afa'a osuguve. Muki ya'mo Afo'amoke'mo naha pai'nige'na ali'na fako hu'na ne'apatove. Nahau'niya kava'mo akame osu'na alino nate'nige'na emine'nova vekamo'a hau'niya kava'amo akame nehuva'mofe'mo kanale hu'na ali'na fako hu'na ne'apatove. 31 Nagaemo nagai'nie'mo faigoko ge'nimo hu'na naha mae'na nehuva gemo lapa paisuvana alagi lama gemo hane'niye, hutapa osugae. 32 Osugaya'monanafa nagaefe'mo faigoko ge'nimo huno naha maeno ge nehiya vekamo mai'niya'mofe'mo, alagi lama ge nehiye, hu'na afi'nove. 33 Lapakaemo Yonitegamo apa'mo alita apate'nage'a u'nageno'ae'mo nagaefe'mo alagi lama gemo aeno hakalo huno hapa pai'niye. 34 Nagaemo ma mopafi vekamo'a nagaefe'mo faigoko ge'nimo huno naha maeno hisiya gemo nagesa ala'amo o'afi'nova'monanafa Goti'a lapakufamo alino katino lapatesiyafe'mo mani gemo nehuve. 35 Yoni'a lamugana huno aeno ha le'niye. Lapakaemo aeno ha le'niya yategamo etapa mai'neta agaefe'mo aise afina'mo amuse hutapa mai'nae. 36 Mai'naya'monanafa nagaefe'mo faigoko gemo huno naha maeno nehiya gemo'a Yoni'a hu'niya ge'amo ago aeno agase'niye. Nehuva kava'mo muki ya'mo Afo'amo'mo huvo, huno naha pai'nige'na nehuva kava'mo'a nagaefe'mo ago faigoko gemo huno naha maeno nehiya gemo'a huno'ae'mo, Muki ya'mo Afo'amo'mo alino ate'nigeno emine'niye, huno alino apave neliye. 37 Muki ya'mo Afo'amo'mo alino nate'nige'na emine'nova vekamo'a nagaefe'mo faigoko gemo huno naha maeno ge nehiye. Lapakaemo mago afina'mo avayafati'mo hu'niya gemo o'afige augosafi'mo o'agege hutapa mai'nae. 38 Lapakaemo alino ate'nigeno emine'niya vekamo ge'amo o'afi'naya'mofe'mo ge'amo alitapa lapaipafi'mo alagi o'male'nae. 39 Lapakaemo Goti Mukufi'mo hane'niya gee'mo kahauya hutapa agege lekana paige hutapa mai'netapae'mo, alagepa huta maige maige huta maisuna ya'mo aligune, hutapa lapakesa ne'afiya'monanafa ani gemo'a nagaefeke'mo hu'niye. 40 Hu'niya'monanafa maige maige hutapa maisaya ya'mo alisayafe'mo nagaetegamo esayafe'mo alagi olapau'niye. 41 Nagaemo ago apakete'nae'mo, ma mopafi mai'naya vaya'mogimo ala nagi'nimo namigae, hu'na nagesa no'afuve. 42 Ago lapake'novana Gotife'mo lapau lapayamopafi'mo alagi olapau'niye. 43 Nagaemo Afo'nimo agi'alefe'mo emi'ne'nogetapae'mo alita falu fala hutapa no'nataya'monanafa mago vekamo'a agai'a agi'alefe'mo agesa afiteno esigetapae'mo alita falu fala hutapa ategae. 44 Vaya'mogi lapakitapile'mo ali'a asaga hu'a lapatesayafe'mo lapau'niya'monanafa magoke vekamo Goti'a lapakitapile'mo alino asaga huno lapatesiyafe'mo lapa'ye hu'nigetapa kahauya nosae. Ani kava'mo nehaya'mofe'mo haiya kava hutapa nagaefe'mo lapakesa afitapa fatago hugae. 45 Lapakaemo nagaefe'mo, agaemo Afo'amotega uno haino'ae'mo ge faino ha paiteno agoti huno lategaiye, hutapa nagaefe'mo lapakesa o'afiyo. Mosesefe'mo laha maegaiye, hutapa lapakesa ne'afiya vekamoke'mo gemo faino ha paisigeno agoti huno lapategaiye. 46 Mosese'a nava gemo huno avo'mo kae male'niya'mofe'mo Mosese ge'ae'mo lapakesa afitapa fatago hu'naesinana ge'nie'mo lapakesa afitapa fatago nehaesine. 47 Lapakaemo avo'mo kae male'niya gee'mo lapakesa afita fatago osu'nisayana haiya kava hutapa navayafati'mo nehuva ge'nie'mo lapakesa afitapa fatago hugae.